愿能直抵解脱寂静洲 ｜ 《杜鹃欢歌》

“杜鹃欢歌”是以譬喻命名。杜鹃即布谷鸟。在藏地，人们都认为杜鹃的鸣叫声是一种吉兆，从此要迎来硕果累累的夏季。“欢歌”指心中情不自禁唱出的欢喜之歌。此赞颂文的法音，就像森林中杜鹃的歌声般微妙悦耳，优美动听，这也意味着吉祥的缘起已经开启，真实的利乐即将到来。

༄། །དབེན་གནས་བཀྲ་ཤིས་ཁྲི་གླིང་ལ་བསྔགས་པ་དཔྱིད་ཀྱི་རྒྱལ་མོའི་རྒྱང་གླུ་ཞེས་བྱ་བ།

རྒྱལ་ཀུན་གསང་གསུམ་མི་ཟད་རྒྱན་གྱི་མཛོད། །

མཁའ་ཁྱབ་ཡེ་ཤེས་སྒྱུ་མའི་རོལ་རྩེད་མཁན། །

མཁྱེན་རབ་རལ་གྲིའི་འཁྲི་ཤིང་གཡོ་བའི་ལྷ། །

འདབ་བརྒྱད་སྙིང་གི་འཁོར་ལོར་རྩེན་པར་མཛོད། །

ཡིད་འོང་དྲང་སྲོང་དགྱེས་པའི་རི་ངོགས་ན། །

དབེན་གསུམ་བདུད་རྩིའི་དཔལ་ལ་སྲེད་པ་ཡི། །

སྐལ་བཟང་མཆེད་གཅིག་དགྱེས་པ་སྐོང་བའི་ཕྱིར། །

བསྟོད་ཚིག་དཔྱིད་ཀྱི་རྒྱལ་མོའི་རྒྱང་གླུ་ལེན། །

ཨེ་མ་འཛམ་གླིང་ཡང་རྩེ་གངས་རིའི་ལྗོངས། །

ཁམས་ཞེས་གྲགས་པའི་གསེར་ལྡན་སྒེག་མའི་གཞིར། །

ཡི༵ད་ཀྱི་ཐིག་ལེ་ལྷུ༵ང་བའི་དགའ་ཚལ་ཞིག །

ས་ལ་ཆགས་པའི་ལྷ་ཡུལ་ཟོལ་གྱིས་སྣང་། །

གནས་དེར་སྙན་ངག་སྨྲ་བ་འབུམ་ཕྲག་གིས། །

བསྔགས་བརྗོད་རོ་འཛིན་གཡོ་བའི་འབབ་སྟེགས་ཀྱི། །

གྲགས་པ་དཀར་པོའི་དཔལ་འཛིན་ལྷ༵་ཡི་མཚོ༵། །

གནམ་སྔོན་ཞུན་མ་ས་ལ་འཁྱིལ་བ་བཞིན། །

དེ་ཡི་ཤར་ཕྱོགས་དབྱིག་གི་བློ་གྲོས་མར། །

ཀྲོང་ངེར་འགྱིང་བའི་སྤོ་མཐོའི་རྫ་ཡི་རི། །

སྔོ་ལྗང་ནགས་ཚལ་དར་གྱི་ཤམ་བུ་ཅན། །

གཏེར་སྲུང་ཡཀྴ་གཟི་འབར་ཞེས་སུ་གྲགས། །

སྔོན་ཞིག་གནས་འདི་སྟག་རོང་ཁྲོ་རྒྱལ་གྱིས། །

བདག་གིར་བཞེས་ནས་སྐུ་མཁར་བཏབ་པའི་ཤུལ། །

ད་དུང་མིག་གི་བདུད་རྩིར་བཀྲ་བའི་གཏམ། །

ས་འདིའི་སྐྱེ་བོའི་ཁ་ན་རླུང་ལྟར་གྲགས། །

མ་བཀོད་བྲག་རི་མཛེས་པའི་བ་གམ་ན། །

མ་རྙོག་དྭངས་བསིལ་གཡུ་ཡི་མཚོ་མོ་གསུམ། །

མ་བཤམས་རང་བྱུང་བདུད་རྩིའི་མཆོད་ཡོན་དུ། །

མ་བསྒྲིགས་བསྟར་ལ་བཀོད་འདི་མཚར་རེ་ཆེ། །

རི་ཡི་འདབས་ན་ཁྲོ་རྒྱལ་དཔོན་པོ་ཡིས། །

ངོ་མཚར་རྫུ་འཕྲུལ་བཀོད་པ་འབུམ་བསྟན་ནས། །

གཏེར་དུ་བཞེས་པའི་ཆུ་ཚན་སྨན་གྱི་རྫིང་། །

བཞི་བརྒྱ་རྩ་བཞིའི་ནད་ཀྱི་གཉེན་དུ་འཁྱིལ། །

གང་གི་གཡོན་ཕྱོགས་ཡིད་ལྷུང་སའི་ཐིག་ལེ། །

བཀྲ༵་ཤི༵ས་དགེ་མཚན་འབར་བའི་ལུང་གཞུང་ན། །

གསེར་གྱི་ཁྲི༵་འཕང་ཇི་བཞིན་སྟེང་གི་ཆར། །

མངོན་པར་འཕགས་པའི་རི་གླི༵ང་ལྟ་ན་སྡུག །

གནས་འདིར་རྣལ་འབྱོར་སྒྲུབ་པ་པོ་རྣམས་ཀྱིས། །

གང་བརྩམས་ལས་རྣམས་མཆོག་དང་ཐུན་མོང་གི །

གྲུབ་གཉིས་འདོད་རྒུས་ནམ་ཡང་མི་གཏོང་ཞེས། །

མཁས་གྲུབ་དུ་མའི་དགོངས་དབྱངས་གཅིག་ཏུ་མཐུན། །

འཇིགས་མེད་ཆོས་རྗེ་ཡིད་བཞིན་ནོར་བུ་ཉིད། །

ཕྱོགས་འདིར་ཆིབས་ཀྱི་ཁ་ལོ་སྒྱུར་བའི་སྐབས། །

ངོ་མཚར་དབང་ཆེན་སྤྲུལ་བའི་ཕོ་བྲང་དུ། །

བསྔགས་པའི་མེ་ཏོག་སིལ་མ་ཆེད་དུ་གཏོར། །

སྟོད་ན་མཚར་སྡུག་ཁ་བའི་གོས་དཀར་ཅན། །

ལྷུན་སྟུག་གངས་རི་ཤེལ་གྱི་མཆོད་རྟེན་འདྲ། །

རྩེ་མོ་ཆུ་འཛིན་བླ་བྲེས་མ་ཟིན་ནས། །

ཀུན་གསལ་ཉི་ཟླའི་རྣ་ཆ་རྒྱན་དུ་འཛིན། །

བར་ན་ཆར་སྤྲིན་གྲོགས་སུ་སྡེབ་པ་ཡི། །

བརྗིད་ཆགས་སྔོ་བསང་རྫ་རི་ཕྱུག་མོ་རྣམས། །

ལྕགས་ཀྱི་ཁྲབ་རྨོག་གྱོན་པའི་དཔའ་བོ་དག །

སོ་ཁ་སྲུང་བའི་སླད་དུ་རྒྱུ་བ་བཞིན། །

སྨད་ན་དལ་བུའི་རླུང་གིས་བསྐྱོད་པ་ཡི། །

ཡལ་གའི་ཁོར་ཡུག་མཛེས་པའི་སྤུ་ལོང་ཅན། །

ཡིད་འོང་ནགས་ཚལ་ཕྲེང་བས་དཀྲིས་པའི་རི། །

མརྒད་ལྷུན་པོའི་དཔལ་ལས་ལན་བརྒྱར་འགོངས། །

མདའ་ན་གཙང་ཆབ་སིལ་མའི་རྒྱན་བཟང་ཅན། །

ཐ་གྲུ་མཉམ་ཞིང་བརྡལ་བའི་གསིང་མ་ནི། །

ཚངས་ཆེན་མེས་པོའི་ཡིད་ཀྱིས་སྤྲུལ་བ་ཡི། །

གཡུ་ཡི་མེ་ལོང་གཉིས་པར་སུ་ཡིས་ཕྱེད། །

ཤ༵ར་ཕྱོགས་ས་འཛིན་ནམ་མཁའི་མཐོངས་ཕྱེ་ཞིང་། །

ལྷོ༵་ཕྱོགས་རི་བོ་རིན་ཆེན་སྤུངས་པ་འདྲ། །

ནུ༵བ་ཕྱོགས་ལྷུན་པོས་ཕྱོགས་ཀྱི་གོ་སྐབས་འཕྲོག །

བྱ༵ང་ཕྱོགས་རྡུལ་བརྩེགས་ཡོལ་བ་བྲེས་པ་འདྲ། །

ས༵་ཡི་སྲུང་བ་བཞི་ཡིས་མཐའ་བརྒྱན་ཅིང་། །

ཆུ༵་ཤིང་རྫ་ཡི་དཔལ་ཁ་ཕུན་སུམ་ཚོགས། །

མེ༵་མཚམས་ནམ་མཁའ་མདའ་ལྟོང་ཕྱེས་པ་འདྲ། །

རླུ༵ང་སེམས་དབང་འདུས་བཀྲ་ཤིས་རེ་ཁ་བཀྲ །

གཡས་རི་སྒོམ་ཆེན་གདན་ལ་བཞུགས་པའི་ཟླ། །

དཔལ་ལྡན་མགོན་པོ་བསྟི་བའི་གནས་མཆོག་ཏུ། །

སྤྲུལ་བའི་གཏེར་སྟོན་འོད་གསལ་རྡོ་རྗེ་ཡིས། །

མངའ་གསོལ་དབུ་འཕང་བླ་ནས་བླ་རུ་བསྟོད། །

གྲོགས་ལམ་དཀར་པོ་ཡངས་ཤིང་རྒྱ་ཆེ་ཞིང་། །

བྱང་ཤར་ལོགས་ན་ཆོས་དུང་རི་མོ་བཀྲ། །

ཕྱོགས་ཀྱི་ཁོར་ཡུག་ར་བས་བསྐོར་བ་འདྲ། །

ནམ་མཁའི་དབྱིབས་ནི་ཟླུམ་སྐོར་ཀུན་ནས་འཁྱིལ། །

འོད་གསལ་ཉི་ཟླ་ཞི་བའི་ཕྱོགས་ནས་ཚེས། །

རྩི་བཅུད་འབྲས་བུ་རྒྱས་པའི་ཕྱོགས་ནས་སྨིན། །

ཉལ་འགྲོའི་རྒྱུན་བཟང་དབང་གི་ཕྱོགས་ནས་འབབ། །

ལྷུན་ཆགས་རི་བོ་དྲག་པོའི་ཕྱོགས་ནས་བརྟན། །

གཡུ་འབྲུག་མ་བུ་འདྲེས་པའི་ཉེ་ཟུར་ན། །

རྒྱ་མཚོ་གཡུ་ཡི་ལྗང་བུ་ལྟ་ན་སྡུག །

ས་དཔྱད་རིན་ཆེན་ཕྲེང་བ་ལས་བསྟན་པའི། །

གཅེས་པའི་ས་ལྔའི་ཡོན་ཏན་འདི་ལ་ཚང་། །

དུས་དང་དུས་སུ་ལྷོ་ཡི་རི་བོ་ལས། །

ཞི་བའི་ནགས་རླུང་དལ་གྱིས་གཡོ་བའི་སྒྲ། །

སྐལ་བཟང་ཐར་ལམ་སྙོག་པའི་སྐྱེ་བོ་ཡི། །

སྙིང་ལ་ངེས་འབྱུང་སྐྱེད་པའི་སྐུལ་མ་འདྲ། །

ལྕུག་ཕྲན་ཡལ་ག་ལྡེམ་པའི་རྩེ་མོ་ན། །

དགའ་བའི་སྒྲོ་གཤོག་གཡོ་བའི་རྣམ་འགྱུར་ཅན། །

འདབ་ཆགས་འཇོལ་མོ་སོགས་ཀྱི་གྲེ་འགྱུར་དབྱངས། །

སྒྲུབ་བརྩོན་སྐྱོ་བ་སངས་པའི་དཔྱིད་དུ་སྙན། །

རབ་དཀར་གླང་པོའི་གཟུགས་འཆང་ཆུ་འཛིན་དག །

འཆར་ཁའི་སྐྱ་རེངས་ཟེར་གྱིས་བསྐུལ་བའི་ཚེ། །

དལ་བུས་ལངས་ཏེ་རི་བོའི་མགུལ་བ་ནས། །

ལོང་ལོང་མཁའ་ལ་འཕྱོ་བའི་གཟིགས་མོ་མཛེས། །

ཉམས་དགའ་བག་ཕེབས་དབེན་པའི་དགའ་ཚལ་འདིར། །

དེ་ལྟའི་ཡ་མཚན་ལྟད་མོ་བརྗོད་མི་ཤེས། །

སུ་ཞིག་གང་གི་དཔལ་ལ་རྗེས་ཆགས་ན། །

ཡིད་ལྷུང་ཁོག་ཏུ་ལན་གཅིག་ཕེབས་པར་ཞུ། །

འབྱུང་འགྱུར་དུས་ཀྱི་རྒྱལ་མོའི་ཕོ་ཉ་ཡིས། །

ཕུན་ཚོགས་རྟེན་འབྱུང་མགྲོན་དུ་བསུས་པའི་ཚེ། །

གནས་འདིར་ངུར་སྨྲིག་འཆང་བས་ཡོངས་གང་ནས། །

བཤད་སྒྲུབ་ཆོས་ཀྱི་དུས་སྟོན་དར་གྱུར་ཅིག །

ལོངས་སྤྱོད་འཁོར་ལོའི་འདབ་མ་བསྐྱོད་པའི་གར། །

རིག་བྱེད་ངག་གི་གདངས་སུ་ཉེར་འཕོས་པ། །

ཡལ་འདབ་ལྔ་པའི་འཕྲུལ་དུ་དྲངས་པ་ལས། །

བསྟོད་ཚིག་དཔྱིད་ཀྱི་རྒྱལ་མོའི་དབྱངས་འདི་གྲུབ། །

དགེ་བ་གང་དེས་མཐའ་ཀླས་ཡིད་ཅན་ཚོགས། །

སྲིད་པའི་སྡུག་བསྔལ་ཁུར་གྱིས་དུབ་པ་ལས། །

ངེས་པར་འབྱུང་བས་ཡིད་ནི་རབ་བསྐྱོད་དེ། །

རྣམ་གྲོལ་ཞི་བའི་གླིང་དུ་དབུགས་ཕྱིན་ཤོག །

ཅེས་པ་འདི་ནི་མཁན་རིན་པོ་ཆེ་ཤེས་རབ་བཟང་པོས་བསྐུལ་བའི་ངོར་འདུ་གསུམ་པ་བསྟན་འཛིན་རྒྱ་མཚོས་བོད་མེ་གླང་ལོའི་ཟླ་བ་༨པའི་ཚེས་༡༣སྤྱི་ལོ་༡༩༩༧ལོའི་ཟླ་བ་༡༠པའི་ཚེས་༡༤ལ་གནས་དེ་ཉིད་དུ་གྲུབ་པར་བགྱིས་པའོ། །དགེ་ཞིང་བཀྲ་ཤིས་པར་གྱུར་ཅིག། །།

沉溺轮回的众生就像远离故乡的浪子，无始以来一直向外攀缘，而忘记了返回内在本具的心地家园。

愿有缘者闻此杜鹃妙音能从迷梦中醒来，由此产生真正的出离心，并通过修行令智慧逐渐增上，最终圆满无量断证功德。